កម្លាំងជំនាញអធិការដ្ឋាននគរបាលស្រុកបាទី សហការជាមួយកម្លាំងនគរបាលប៉ុស្តិ៍គ្រប់ប៉ុស្តិ៍ពាក់ព័ន្ធចុះស្រាវជ្រាវកំណត់មុខសញ្ញារហូតឈានដល់ឃាត់ខ្លួនជនសង្ស័យជាបន្តបន្ទាប់បាន០២នាក់,,,,,

ខេត្តតាកែវ ៖ នៅថ្ងៃព្រហស្បតិ៍ ២ រោច ខែស្រាពណ៍ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី៦ ខែសីហា ឆ្នាំ២០២០ វេលាម៉ោង១៤នឹង៣០នាទី មានករណីប៉ុនប៉ងឃាតកម្មកើតឡើងនៅភូមុសំរោង ឃុំសូភី ស្រុកបាទី ខេត្តតាកែវ។

បង្កឡើងដោយជនសង្ស័យមានគ្នា២នាក់ជិះម៉ូតូមួយគ្រឿងម៉ាកហុងដាc125 ពណ៌ខ្មី សេរីឆ្នាំ២០០៨ ពាក់ផ្លាកលេខកំពង់ចាម  1A-4483 បានធ្វើសកម្មភាពប្រដាប់ដាវកាប់ទៅលើជនរងគ្រោះឈ្មោះ គ្រី វុត្ថា ភេទប្រុស អាយុ២៧ឆ្នាំ បណ្តាលឱ្យរងរបួសធ្ងន់ ខណៈពេលកំពុងជិះម៉ូតូតាមផ្លូវ ត្រូវបានបញ្ជូនទៅសង្រ្កោះនៅមន្ទីរពេទ្យរាជធានីភ្នំពេញ។

កម្លាំងជំនាញអធិការដ្ឋាននគរបាលស្រុកបាទី សហការជាមួយកម្លាំងនគរបាលប៉ុស្តិ៍គ្រប់ប៉ុស្តិ៍ពាក់ព័ន្ធចុះស្រាវជ្រាវកំណត់មុខសញ្ញារហូតឈានដល់ឃាត់ខ្លួនជនសង្ស័យ ០១នាក់ឈ្មោះ វ៉ាង ចិន្តា ភេទប្រុស អាយុ៣០ឆ្នាំ មានទីលំនៅភូមិក្រាំងពង្រ ឃុំកុមារាជា ស្រុកបាទី ខេត្តតាកែវ ដើម្បីធ្វើការសាកសួរ។

ក្រោយទទួលបានចម្លើយសារភាពនៅព្រឹកថ្ងៃទី០៧ ខែសីហា ឆ្នាំ២០២០  កម្លាំងជំនាញបានបន្តឃាត់ខ្លួនជនសង្ស័យម្នាក់ទៀតឈ្មោះ វ៉ាង ចន្ទ្រា ភេទប្រុស អាយុ២១ឆ្នាំ  មានទីលំនៅភូមិ  ឃុំជាមួយគ្នា ព្រមទាំងដកហូតម៉ូតូមួយគ្រឿងដែលជិះធ្វើសកម្មភាព និងដាវមួយដើម។ 

តាមការសាកសួរឱ្យដឹងថា មូលហេតុដែលឈានដល់ការប្រព្រឹត្តអំពើខាងលើគឺដោយសារគំនុំចាស់ជនរងគ្រោះធ្លាប់វាយមិត្តភ័ក្ររបស់ខ្លួន។ បច្ចុប្បន្ន ជនសង្ស័យនិងវត្ថុតាង កម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី។