លោកឧត្តមសេនីយ៍ត្រី សិទ្ធិឡោះ ស្នងការខេត្តបន្ទាយមានជ័យបានដឹកនាំកម្លាំង ដឹកជញ្ជូន អ្នកទោសពន្ធនាគារខេត្តបន្ទាយមានជ័យ ទៅកាន់ពន្ធនាគារខេត្តសៀមរាបខណៈទឹកជំនន់វាយលុក,,,,,

 

បន្ទាយមានជ័យ ៖ ដោយទឹកជំនន់ហក់ឡើងខ្លាំងបានធ្វើអោយមានការជនលិចភូមិដ្ឋាននិងអាគារស្ថាបន័ មន្ទីរមួយចំនួនក្នុងក្រុងសិរីសោភ័ណ អាជ្ញាធរបានបង្ខំចិត្តជម្លៀសប្រជាពលរដ្ឋរបស់ខ្លួនទៅកាន់ទីទួលសុវត្ថិភាព ។

ក្នុងនោះដែរគណៈគ្រប់គ្រងពន្ធនាគារខេត្តបន្ទាយមានជ័យក៏បានបង្ខំចិត្តធ្វើការជម្លៀសជនកំពុងជាប់ឃុំចេញពីពន្ធនាគាររបស់ខ្លួនទៅកាន់ពន្ធនាគារនៃខេត្តសៀមរាបផងដែរ។

លោក អ៊ុង ស៊ីផាន ប្រធានពន្ធនាគារខេត្តបន្ទាយមានជ័យបានអោយដឹងថាជនជាប់ឃុំក្នុងពន្ធនាគារនេះមានចំនួន១៦០០នាក់ក្នុងនោះស្រី១០០នាក់។ 

ទឹកបានហូរចូលមកក្នុងពន្ធនាគារខេត្តបន្ទាយមានជ័យយ៉ាងគំហុក ធ្វើអោយមានការលិចអាគាររដ្ឋបាលនិងបន្តហូរចូលទៅក្នុងអាគារស្នាក់នៅរបស់ជនជាប់ឃុំ។

ដូច្នេះដើម្បីបញ្ជៀសផលប៉ះពាល់ផ្សេងៗគណៈគ្រប់គ្រងសម្រេចធ្វើការជម្លៀសចេញបន្ទាន់ជនជាប់ឃុំទៅកាន់ពន្ធនាគារនៃខេត្តមួយចំនួនជាបណ្តោះអាសន្ន។

ជាក់ស្តែងជំហានដំបូងនៅព្រឹកថ្ងៃទី១៣ខែតុលាឆ្នាំ២០២០នេះជនជាប់ឃុំចំនួន៨១១នាក់ស្រី៨៥នាក់ត្រូវបញ្ជូនចេញទៅកាន់ពន្ធនាគារខេត្តសៀមរាបតាមរថយន្តក្រុង។

លោកថាការជម្លៀសចេញអោយទាន់ពេលវេលានេះគឺដើម្បីបង្ការនូវហានិភ័យផ្សេងៗដែលនឹងកើតមានឡើងនៅពេលដែលទឹកវាយលុកខ្លាំងជាងនេះ។ចំពោះជនជាប់ឃុំដែលនៅសេសសល់នឹងត្រូវជម្លៀសចេញនៅពេលបន្តបន្ទាប់គ្នាខណៈទទួលបានការឯកភាពពីថ្នាក់លើ។

សូមរំលឹកផងដែរថា ពន្ធនាគារខេត្តបន្ទាយមានជ័យបានរងការវាយប្រហារពីទឹកជំនន់បីឆ្នាំមកហើយដោយក្នុងនោះឆ្នាំ២០០៨ ឆ្នាំដំបូងនៃការដូរពន្ធនាគារមកកាន់ទីតាំងនេះជំនន់បានវាយប្រហារតិចតួច នៅឆ្នាំ២០១៣ទឹកវាយប្រហារខ្លាំងជនជាប់ឃុំត្រូវបង្ខំចិត្តជម្លៀសចេញទៅកាន់ខេត្តបាត់ដំបងនិងសៀមរាប និងឆ្នាំ២០២០នេះក៏បង្ខំចិត្តជម្លៀសចេញនូវជនជាប់ឃុំទៅកាន់ខេត្តសៀមរាបនិងខេត្តដទៃមួយចំនួនផងដែរ៕