ជនជាតិចិនជិត ៣០នាក់ត្រូវបានកម្លាំងអាវុធហត្ថភ្នំពេញ ចុះបង្ក្រាប ករណីចាប់ជម្រិតយកប្រាក់លើជនជាតិចិនដូចគ្នា រំដោះបានជនរងគ្រោះ ០៣នាក់,,,
ភ្នំពេញ៖កម្លាំងកងរាជអាវុធហត្ថរាជធានីភំ្នពេញ បានចុះបង្ក្រាបជនជាតិចិរាជធានីភំ្នពេញ នៅចំណុច សណ្ឋាគារមួយ ដែលមានឈ្មោះថា កណ្តាលសួនច្បារ នាវេលាម៉ោង១២ នឹង ៣០នាទី ថ្ងៃទី១២ ខែសីហា ឆ្នាំ២០២០ ស្ថិតក្នុងសង្កាត់ចតុមុខ ខណ្ឌដូនពេញ។
លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានឲ្យដឹងថា ដោយមានការណែនាំចង្អុលបង្ហាញ ពីលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស កម្លាំងជំនាញកងរាជអាវុធហត្ថរាជធានី
ភ្នំពេញ ដឹកនាំដោយមេបញ្ជាការរង ០២រូប គឺលោកឧត្តមសេនីយ៍ត្រី ពូ ដាវី និងលោកឧត្តមសេនីយ៍ត្រី ផាន់ តារាវុធ សហការជាមួយកម្លាំងមូលដ្ឋានអាវុធហត្ថខណ្ឌដូនពេញ ដឹកនាំដោយលោកវរសេនីយ៍ឯក ថោង ពិសិដ្ឋ ព្រមទាំងមានការចូលរួមពីលោក សុខ ពេញវុធ អភិបាលខណ្ឌដូនពេញ ក្រោមការសម្របសម្រួលពីព្រះរាជអាជ្ញារង ឆាយ ហុង បានចុះបង្ក្រាបជនជាតិចិនមួយក្រុម ដោយឃាត់ខ្លួនជនជាតិចិនចំនួន ២៩នាក់ (ស្រី ០៣នាក់)។
ប្រតិបត្តិការមួយនេះ ធ្វើឡើងបន្ទាប់ពីសមត្ថកិច្ចទទួលបានព័ត៌មានថា ក្រុមជនសង្ស័យទាំងនេះ ជាប់ពាក់ព័ន្ធករណីចាប់ជម្រិតយកប្រាក់លើជនជាតិចិនដូចគ្នា ដោយក្នុងនោះសមត្ថកិច្ចរំដោះបានជនរងគ្រោះចំនួន ០៣នាក់។
បច្ចុប្បន្ន សមត្ថកិច្ចអាវុធហត្ថរាជធានីភ្នំពេញ កំពុងសួរនាំជនសង្ស័យ ដេីម្បីកសាងសំណុំរឿងតាមនិតិវិធី ៕
No comments